�ݺ�ߣ

L-Ewwel Qari mill-ktieb tal-Għerf (Kap 14: versi 3-7)

O Missier, bil-Providenza Tiegħek, Inti tmexxi l-bniedem.

Għax Int tajtu triq fil-baħar, u mogħdija żgura fuq il-ħalel.

Int urejt li tista’ tħarsu minn kull tiġrif, hekk li wkoll min mhux tas-sengħa jista’ jbaħħar.

Int ma tridx li l-opri ta’ l-għerf Tiegħek jisfgħu fix-xejn; għalhekk il-bnedmin jafdaw ħajjithom fuq daqsxejn ta’ laqxa,

Għax tassew sa mill-bidu taż-żmien, meta l-ġganti kburin kienu qegħdin jinqerdu,

it-tama tad-dinja sabet il-kenn fuq dgħajsa u mmexxija minn Idek, ħalliet lid-dinja ż-żerriegħa ta’ nisel ġdid.

Imbierka l-għuda li biha jsir is-sewwa!

Il-Kelma tal-Mulej! Inroddu ħajr lil Alla!

Ħa jsebbħu l-Mulej għal tjubijtu, għall-għeġubijiet Tiegħu mal-bnedmin!

Ħa joffru sagrifiċċji ta’ radd il-ħajr, u jxandru l-għemejjel Tiegħu b’għana ferrieħi.

Dawk li jmorru bil-baħar fuq l-iġfna, li jgħamlu l-qligħ f’ibħra kbar ħafna,

huma raw l-għemejjel tal-Mulej u l-opri tiegħu ta’ l-għaġeb f’qiegħ il-baħar.

Hu ordna u qajjem rifnu, li qanqal l-imwieġ tal-baħar.

Għolew m’ogħla s-smewwiet, niżlu sa qiegħ il-baħar; qalb-hom tmewtet bil-biża tat-telfa.

Bdew iduru u jixxenglu bħal nies fis-sakra, u tilfu ħilithom kollha.

Sejħu l-Mulej fit-tiġrib tagħhom u mill-hemm tagħhom ħelishom.

Hu bidel ir-riefnu f’żiffa u siktu mwieġ il-baħar.

Huma ferħu għax waqfu l-imwieġ; u Hu mexxiehom sal-port li xtaqu.

It-Tieni Qari, mill-Ktieb ta’ l-Atti ta’ l-Appostli. (Kap 27 vers 16 – Kap 28 vers 6)

F’dak iż-żmien, b’girja waħda għaddejna taħt ir-riħ ta’ daqsxejn ta’ gżira jisimha Kawda. Bilkemm stajna nżommu d-dgħajsa warajna u għalhekk tellgħuha mill-baħar.

Imbagħad qabdu l-armar u rabtu l-ġifen dawramejt biċ-ċimi, niżżlu l-qlugħ u l-arbli, għax beżgħu li ninkaljaw fuq is-Sirti, u hekk ħallejna l-mewġ ikaxkarna miegħu.

Il-għada t-tempesta ħabbtitna ħafna, bdew iwaddbu t-tagħbija l-baħar, u fit-tielet jum irmew il-parank tal-ġifen b’idejhom stess.

Għal ħafna jiem la dehret xemx u lanqas kwiekeb, it-tempesta li laqtitna ma kinitx ħafifa, hekk li fl-aħħar tlifna kull tama li nsalvaw.

In-nies kienu ilhom ħafna ma jieħdu xi ħaġa biex jitrejqu; Pawlu waqaf f’nofshom u qalilhom:

“ Ħbieb, kien imisskom smajtu minni u ma tlaqtux minn Kreta; kontu teħilsu minn din il-ħsara u t-telf!

Għax dal-lejl deherli anġlu ta; dak Alla li Tiegħu jien u li Lilu nqim, u qalli:

“ Tibżax Pawlu. Jeħtieġ li inti tidher quddiem Ċesari; ara, Alla tak il-ħajja ta’ dawk kollha li qegħdin jivjaġġaw miegħek.”

Mela qawwu qalbkom ħbieb! Jiena nemmen f’Alla li hekk isir, sewwa sew kif tħabbar lili.

Jeħtieġ iżda li naħbtu ma gżira.”

Meta wasal l-erbatax-il lejl, konna ninsabu mitfugħin ‘l hawn u ‘l hemm fil-baħar ta’ l-Adrija. Għall-ħabta ta’ nofsillejl il-baħrin ħassew li konna resqin qrib xi art.

Skandaljaw il-għoli tal-baħar, u sabu għoxrin qama, imxejna ftit ieħor u sabu ħmistax. Huma beżgħu li xi mkien konna se naħbtu ma xi sikka u għalhekk niżżlu erba’ ankri mill-poppa.

Ix-xewqa tagħhom kienet li ma jdumx ma jisbaħ.

Iżda Pawlu qal lic-ċenturjun u lis-suldati: “Jekk dawn ma jibqgħux fuq il-ġifen, intom ma tistgħux issalvaw.” Imbgħad is-suldati qaċċtu l-ħbula tad-dgħajsa u ħallewha tmur għal riħha.

Meta sar il-ħin biex jisbaħ, Pawlu qabad iħħajjarhom ilkoll biex jitrejjqu b’xi ħaġa

u qalilhom: “Issa ġa ilkom erbatax-il ġurnata tistennew sajmin u ma dduqu xejn. Għalhekk inħajjarkom tieħdu xi ħaġa tal-ikel u jwettqilkom saħħitkom,

Kif qal dan, qabad il-ħobż, radd il-ħajr ‘l Alla quddiem kulħadd, qasam u beda jiekol. Imbagħad kulħadd għamel il-qalb u ħadu xi ħaġa ta’ l-ikel huma wkoll.

Konna b’kollox mitejn u sitta u sebgħin ruħ fuq il-ġifen. Wara li xebgħu bdew iħeffu l-ġifen u jwaddbu l-qamħ il-baħar.

Meta mbagħad sebaħ, l-art ma għarfuhiex. Lemħu biss bajja bi xtajta fiha, u qatgħuha li jekk jista jkun jitfgħu l-ġifen fuqha.

Irħew l-ankri u telquhom il-baħar, u ħallew ukoll l-irbit tat-tmun. Imbagħad tellgħu l-qala’ tat-trinkett għar-riħ u ħadu għax-xtajta.

Iżda ħbatna ma sikka li kellha l-baħar miż-żewġ naħat. Il-pruwa baqgħet imwaħħla sewwa fil-post u ma tħarrkitx iżjed, imma l-poppa bdiet titfarrak bil-qilla tal-mewġ.

Is-suldati riedu kieku joqtlu l-priġunieri, li ma jaħrabx xi ħadd minnhom bil-għawm; iżda ċ-ċenturjun li ried isalva ‘l Pawlu ma ħalliex il-ħsieb tagħhom iseħħ.

Lil dawk li kienu jafu jgħumu ordnalhom jilħqu x-xatt min fuq twavel u min fuq bċejjeċ imkissra tal-ġifen.

Meta ħlisna mill-għarqa, sirna nafu li l-gżira kien jisimha Malta.

In-nies tagħha ġiebu ruħhom bi ħlewwa liema bħalha. Laqgħuna tajjeb lilna lkoll

u qabbdulna ħuġġieġa għax kienet bdiet nieżla x-xita u kien il-bard.

Mela Pawlu ġabar qatta zkuk niexfa u tefagħhom fin-nar. Fiz-zkuk kien hemm lifgħa li malli ħasset is-sħana, ħarġet u qabdet ma’ id Pawlu.

In-nies tal-gżira kif raw il-lifgħa mdendla ma idu, bdew jgħidu wieħed lill-ieħor: “Dar-raġel żgur xi qattiel, għax għad li ħelisha mill-baħar, il-ġustizzja ma ħallitux jgħix!”

Imma hu farfar il-lifgħa ġon-nar u ma ġralu xejn.

Huma stennew li sa jarawh jintefaħ jew jaqa’ u jmut f’daqqa. Wara li damu jistennew ħafna u raw li ma ġralu ebda deni, biddlu l-ħsieb u bdew jgħidu li kien xi alla.

Il-Kelma tal-Mulej! Inroddu ħajr lil Alla! Jeħtieġ li naslu fi gżira!

Faħħru l-Mulej, ġnus kollha, sebbħuH popli kollha għaliex qawwija hi l-Grazzja Tiegħu għalina: il-fedelta’ tal-Mulej tibqa’ għal dejjem. Hallelujah! Hallelujah!

Qari mill-Evan ġelju skond San Mark (Kap 16: 15-20)

F’dak iż-żmien, Ġesu qal lill-ħdax:

“ Morru fid-dinja kollha, xandru l-Bxara t-Tajba lill-ħolqien kollu.

Min jemmen u jitgħammed isalva; iżda min ma jemminx ikun ikkundannat.

U hekk il-Mulej Ġesu, wara li kellimhom, kien imtella’ fis-sema u qagħad in-naħa tal-lemin ta’ Alla.

Huma mbagħad marru jippridkaw kullimkien

il-Mulej kien jaħdem magħhom u jwettaq il-Kelma bil-mirakli li kienu jsiru magħha.

Il-Kelma tal-Mulej. Tifħir lilek Kristu !

�ݺ�ߣ

St Paul's Shipwreck in Malta

More Related Content

St Paul's Shipwreck in Malta