Helburu pedagogikoak
- 1. HELBURU PEDAGOGIKO OROKORRAK HAUR HEZKUNTZA Zer ikasten dute zure seme-alabek Haur Hezkuntzan? Haur Hezkuntza haurrek hezkuntza sistemarekin daukaten lehenengo kontaktua da. Adin honetan (2-5 urte) gurasoek garrantzi handia daukate, eta horretxegatik Ikastolako ekintzekin bat egitea beharrezkoa da. Etapa honetan zehar ikasleak bere gorputza deskubritzen du, eta era berean kontrolatzen ikasten du, gero eta era autonomoago batez jokatzen hasten delarik. Horrela, berarengan konfiantza eta iniziatiba garatzen hasten da. Era honetan ingurunearekin erlazio sozialak mantentzeko gai izaten hasten da (helduekin zein bere adinekoekin). Era berean, afektuzko adierazpenak elkartrukatzen ikasten du, eta desberdintasunak errespetatzen. Jakin-minak bultzatuta, haur hezkuntzako umeek ingurune naturala eta kulturala behatu, ikertu... egiten dute, eta errespetatzen ikasten dute. Errealitatearen aspektu desberdinak adierazten ere irakasten dizkiegu. Etapa honetako beste helburu bat, ikasleak bere ideiak, sentimenduak, esperientziak eta nahiak espresatzen ikastea da. Gainera, bere adinari dagozkion posibilitate adierazkorrak eta artistikoak gara ditzan laguntzen dugu. LEHEN HEZKUNTZA Haurraren gaitasunak garatuz. Ikasleak dituen gaitasunak garatzea da Lehen Hezkuntzako helburu nagusia. Umearen gaitasunak indartzea gizartean integra dadin. Etapa honetan haurrak bere gorputza ezagutu eta preziatuko du eta osasun ohiturak hartuko ditu. Ekimen propioei ekiteko gai izango da, eta baita harreman afektiboak sortzeko ere. Umeak talde jardueretan parte hartzen du, eta dagozkion erantzukizunak bereganatuz, ikuspuntu ezberdinak errespetatzen ikasten du. Sineste, arraza, sexu edo bestelako bereizkeriak baztertzen ikasiko du, elkartasunezko harremanetan oinarrituta. Etapa honetako beste helburu bat komunikazioari lotuta dago. Izan ere, ikaslea ahoz eta idatzizko mezuak ulertzeko eta sortzeko gauza izango da, euskaraz nahiz gazteleraz. Eta, maila sinpleagoan, baita atzerriko hizkuntza batean ere (ingelesa adibidez). Lehen Hezkuntza hiru ziklotan banatuta dago (hasierakoa, erdiko eta goikoa) eta bakoitzak bi urteko iraupena du. Sei urte hauetan zehar ikasleak Derrigorrezko Bigarren Hezkuntzarako funtsezko diren kontzeptuak, teknikak eta jarrerak ikasiko ditu.