Polimatía: Leonardo e o Renacemento
Este ano 2019 celébrase o quinto centenario da morte dun dos homes con máis talento de toda a historia, Leonardo da Vinci, o mestre do Renacemento italiano. Para conmemorar esta efeméride, na Biblioteca Municipal Forum Metropolitano imos dedicarlle o último Ciclo Temático do ano. Leonardo, que morreu en 1519 no Castelo de Clos-Lucé, na localidade francesa de Amboise, deixou un legado que vai moito máis alá de "A Gioconda" ou "A última cea". Era un xenio multidisciplinar con estudos de anatomía, urbanismo, pintura, inventos visionarios... dominou ciencia, técnica e arte. Foi descrito a miúdo como o arquetipo do home renacentista e un home de curiosidade insaciable, en definitiva un Polímata. Prestaremos especial atención á época do Renacemento, nome dado no século XIX a un amplo movemento cultural que se produciu en Europa Occidental durante os séculos XV e XVI. Os seus principais expoñentes atópanse no campo das artes, aínda que tamén se produciu unha renovación nas ciencias. Sen dúbida foi este un cambio moi profundo e complexo, que transcendeu a todas as ordes da vida. Para esa época producíronse algúns fitos moi importantes como a invención da imprenta por Gutenberg e o desenvolvemento da teoría heliocéntrica de Copérnico. Estes foron elementos propiciadores dunha revolución científica e social dunha magnitude impensable até entón. Ademais este ano tamén é o V centenario da primeira circunnavegación á terra, realizada pola expedición de Fernando de Magallanes e Elcano, de 1519 a 1522. Tras a viaxe e a primeira volta ao mundo púidose confirmar a teoría de Terra esférica e tivo repercusións como a globalización, apertura dunha rede intercambios intercontinentais e creación de mecanismos de financiamento das rutas comerciais.
Polimatía: Leonardo e o Renacemento
- 1. Todas as actividades realizaranse na #BibliotecaForum. Inscríbete na nosa web: www.coruna.gal/bibliotecas CHARLA: DESCOBRE O XENIO DETRÁS DE DA VINCI. A cargo de María Belén Rosbier e Andrea Maceira Antanes Luns, 21 de Outubro ás 19:00 h. Acceso libre ata completar capacidade. Coñece os sucesos da súa vida e as características da súa personalidade que o levaron a pasar á historia como o máis grande de tódolos xenios. Leonardo foi un home do seu tempo, o home do Renacemento, un polímata que non deixou campo do coñecemento sen estudar. Con todo, tamén viviu adiantado ao seu tempo, xa que desenvolveu inventos para os cales aínda non existía a tecnoloxía necesaria para levalos a cabo. Pero sobre todo foi perseverante: tentou, fracasou e continuou para deixarnos un dos legados máis impresionantes de todos os tempos. CHARLA: VENI, VIDI, VINCI. DIFUSIÓN E CONQUISTA DAS IDEAS RENACENTISTAS. A cargo de María do Carme Galego Marante Luns, 28 de Outubro ás 19:00 h. Acceso libre ata completar capacidade. Imos abordar a viaxe das formas do quattrocento e cinquecento italiano. Como eclosionan co concepto de estado moderno das monarquías europeas que as inxectan nun novo mundo e con novos medios técnicos. Veremos que o humanismo chegou para quedarse; tamén a Galicia. Unha impronta que aínda hoxe fascina á arte e á ciencia. OBRADOIRO: EU SON LEONARDO DA VINCI, UN ESPECTÁCULO CON CIENCIA. A cargo de Limiar Teatro Mércores, 13 de Novembro ás 18:00 h. Dirixido á mocidade de 12 a 18 anos Inscrición previa dende o 6 de Novembro a partir das 10:00 h. Eu tamén son Leonardo da Vinci é una proposta lúdica coa que achegarnos á figura do xenio do Renacemento e pensar na ciencia, na investigación e no futuro dende a igualdade. Ten por obxectivo fomentar as vocacións científicas no alumnado de secundaria.. OBRADOIRO: A ARTE NOS LIBROS: LEONARDO DA VINCI. A cargo de Crearte Servizos Culturais Mércores, 20 de Novembro ás 18:30 h. Dirixido a nenas e nenos de 8 a 11 anos Inscrición previa dende o 13 de Novembro a partir das 10:00 h. Unha viaxe ao Renacemento na que as grandes ansias de coñecelo todo xuntáronse en Leonardo da Vinci, un home avanzado ao seu tempo. Afondaremos nas facetas de inventor, científico e artista, descubriremos curiosidades nas súas obras de arte e remataremos a actividade cun obradoiro relacionado coa ciencia, coa luz, que a él tanto lle interesou: faremos una mini-cámara escura. Actividades relacionadas