1. >vekevridd
SURNE OVER SPILT MJØLK
NO HAR DEl FORBANNA idiotane bestemt at det ikkje lenger skal stå
Tine Mjølk på mjølkekartongane. Det skal stå Tine Melk på alle saman.
Denne absurde avgjersla kunne lett fått meg til å bli ufin, men eg
skal halde meg sakleg i resten av teksten også.
NOKON I TINE MÅ KLAKKAST på pottekanten. Her har eg gått og håpa
på at vi snart skulle få Den Nynorske Primen, gjerne med bilete av ein
smørblid lvar Aasen på loket. Eg har vore naiv og trudd at gulosten
skulle bli kvit. Eg har både håpa og trudd at Tine snart skulle lansere
Nynorsk Brie, Smyrjeost og Kvitlauksmør. At mjølka nokon gong skulle
forsvinne, har eg ikkje ofra ein tanke, sjølv ikkje i dei dystraste stunder
har eg tenkt på at dette kunne skje. Men no skjer det. Aldri meir
lettmjølk. Aldri meir heilmjølk. No skal alt bli melk.
EIN AV kommunikasjonssjefane i Tine, Olav Håland (truleg overbetalt),
hevdar at endringane vil gi meir nynorsk, fordi ein større del av
kartongane skal få nynorsk informasjonstekst. Informasjonstekst? Kva
skal vi med informasjonstekst? Det er mjølk vi snakkar om her, ikkje ei
flatpakke frå lkea. Kva skal det stå i den informasjonsteksten? ”Mjølk
(norr mjolk): gulkvit næringsrik væske frå mjølkekjertlane hjå
hopattedyr. Ha i degl”
Kommunikasjonssjef Olav Håland (han var truleg svak i skolen
også) trøystar oss med at 15 millionar kartongar med kulturmjølk og
skumma kulturmjølk skal få Tine Mjølk-logoen. Men vi kan då ikkje
overleve på surmjølk åleine.
DU LURAR KANSKJE NO. Er dette noko å hisse seg opp over? Er dette
viktig?
Nei, eigentleg ikkje. Men om det ikkje er viktig, kvifor er det då så
om å gjere å endre på det? Kunne ikkje mjølka fått vore som ho er?
Og om ikkje vi, Dei Nynorske Mjølkedrikkarane, skal få lov å ergre
oss over dette, kva skal vi då engasjere oss i? Problema i Nav? Boka til
Ingunn Yssen? Finanskrisa? Oljefondet? Den sympatiske Petter
Northug?
SKJERP DEG, Olav Hålland! (Legg merke til at eg skriv namnet hans feil,
for på den måten å vere endå meir hånande.)
Eg har ete ein banan no og fått opp blodsukkeret. Eg har lese
gjennom teksten min, og innser at eg kanskje går litt høgt ut mot Tine.
Det er mellom anna ikkje sikkert at kommunikasjonssjefen i Tine var
svak i skulen og at han er overbetalt. Og skal eg vere heilt ærleg, har eg
vel eigentleg ikkje tenkt så mykje på denne saka etter at eg fikk høyre
om ho. Men no må du ikkje dermed tru at eg skreiv dette for å
latterleggjere dei som kjempar for å behalde Mjølk på
mjølkekartongen. Det latterlege er ikkje at nokon ynskjer det. Det
latterlege er at dei faktisk må kjempe for dette. Det latterlege er at vi i
framtida må heilt til Sverige for å få tak i mjölk.
BTMagasinet (helgebilag til Bergens Tidende) 21. mars 2009
Vekevridd: ei fast kåserispalte i BTMagasinet, oftast med eit “skrått blikk” på ulike tema
