1. ARTO LAPURRA. PROIEKTU BIDEZKO IKASKUNTZA
Proiektu hau Bizkaiko herri txiki bateko eskolan egin zen. Eskola horretako Lehen Hezkuntza
lau kidez osatuta zegoen eta horien artean proiektua aurrera eraman zuten. Proiektu honen
helburua ipuinen bitartez teknologia berriak sustatzea da. Hain ikasle gutxi ziren non ez zuten
inongo arazorik izan ordenagailu kopuruari begira.
Esan bezala, proiektu honen helburua teknologia berriak erabiliz ipuin bat sortzea da, baina ez
edozein ipuin, haien herrian ahoz aho transmititu den bat baizik. Horretarako, umeak kalera
atera eta hasieran grabadora baten laguntzaz, jendeari galdezka hasi ziren, hala ere, jendeak
ez zuen laguntza handirik eman, proiektu honen aurrean, grabadorak intimidatzen baitzituen.
Hurrengo batean grabadorarik gabe atera ziren herriko kaleetara eta oraingo honetan dena
beren buruetan gordeko zuten. Honek arazo bat suposatu zuen, eskolara iristean zenbait gauza
ahaztuta zeuzkaten, eta horregatik eszena batzuk asmatu beharra ikusi zuten.
Eszena guztiak sortzeaz aparte, hauetako bakoitzaren marrazki bat egin zuten, eta horretarako
Photoshop-aren laguntza izan zuten.
Azkenik, lana bukatuta, eskola guztiaren aurrean haien ipuina ikusi zuten eta denak txunditurik
gelditu ziren.
Proiektu honek oso emaitza positiboak izan ditu, izan ere, ikasleak haien alde artistikoa eta
linguistikoa lantzeaz gain, teknologia berriak eskola eremuan ere lan politak egiteko erabili
daitezkeela ikasi dute.
